Opuseko ospitalean lan egiten dutenek Osasunbidera jo beharko dute hemendik aurrera, gainontzeko herritar guztiak bezala. Horrela jakinarazi zuen exekutiboak, eta azken egunak protesta artean joan badira ere, irmo mantendu da bere horretan gobernua.
UPNk eta PPk kontzertua defendatu dute, baina kontra egin dute EH Bilduk, Geroa Bai, Ahal Duguk eta Ezkerrak. Eta gehiengoa izaki, erabakita dago: Osasunbidean artatu beharko dituzte hemendik aurrera klinikan artatzen zituzten 7.000 lagun horiek; alegia, euren seguru pribatuak ez dituzte herritar guztiek pagatuko.
UPNko Begoña Ganuzak 7.000 pertsonen osasuna "arriskuan" dagoela esan du, eta lauko gobernuari osasuna "jaurtitzeko arma" gisa erabiltzea leporatu dio.
EH Bilduko Bakartxo Ruizek "pribilegioarekin" bukatzeko ordua dela aldarrikatu du, eta ahoan bilorik gabe mintzatu da: "Muturra behar da gero lau urtetan osasunaren kalitateaz arduratu ez eta orain hortza hitz egiteko".
Geroa baiko Koldo Martinezek, aldiz, "diskurtso beldurgarriak" egitea egotzi die erregionalistei, eta "apokalipsia" ez dela iritsiko argudiatu du.