Aholkularitza Juridikoko Zerbitzuari dagozkion legezko akzioak aztertzeko baimena ematea erabaki du Nafarroako Gobernuak gaurko bileran, Lehen Hezkuntzako 6. mailako derrigorrezko "errebalida"-ri buruzko estatuko araudia errekurritzeko.
Foru Gobernuaren iritziz, indarrean dagoen arauak ez ditu Nafarroako eskumenak errespetatzen hezkuntza-arloan ezta ikastetxeen autonomia ere.
Arrazoi pedagogikoak ere
Hezkuntzako kontseilari Jose Luis Mendozak Aragoiko Gobernuko homologo Mayte Perezekin abenduan egindako bilkuran jadanik aurreratu zuenez, Nafarroak Errege Dekretu horren aurka beste hamar autonomia erkidegok gutxienez aurkeztuko duten errekurtsoarekin bat eginen du.
Nafarroako Gobernuaren aburuz, azterketa hori, hezkuntzako era honetako jardueretan ezinbestekoa den adostasuna ez izateaz gain, "ez da ebaluazio bat, ebaluazio batek izan beharreko izaera jarraitua, orokorra, prestakuntzakoa eta orientatzailea ez baititu; gainera ikasleen bilakaeraren une zehatz batera eta testuingurutik kanpoko egoera batera murrizten du".
Halaber, azterketa Lehen Hezkuntzan garatutako zazpi konpetentziatatik biri buruz soilik izango da; beraz, Foru Gobernuaren ustez, "ikasleei buruzko informazio aipagarririk ez du emanen, hezkuntzako etapa horretan ikasleekin harremanetan izan diren irakasleen txostenetan azaltzen denarekin guztiz bestelakoa dena".
Azterketa horren aurka izateko Gobernuak eman duen beste arrazoietako bat da irakasleek ebaluatzeko duten profesionaltasuna eta objektibotasuna zalantzan jartzen dela, bai eta ikastetxeetako zuzendaritza-taldeena edo ikuskaritzarena ere. Izan ere azterketa horiei baliozkotasuna emateko kanpoko profesionalenagana jo behar dela azpimarratu dute Hezkuntza Departamentutik. Nafarroako Gobernua kezkati agertu da "errebalida" horrek ikastetxeetan ranking-ak ezartzeko balio dezakeelako, eta horrek "ikastetxeak diskriminatzen eta ospea kentzen lagunduko luke, eta hezkuntzako lanari ez lioke mesederik egingo".