Baztango Batzar Nagusiak eta Lekarozko herriaren eskaera izanda, 900 sinadura bildu ditu Aroztegia…eta gero zer? plataformak Nafarroako Gobernuari Udalaz Gaindiko Plan Sektoriala gelditzeko eskatuz. Izan ere, Lekarozen, 359 biztanle dituen herri batean, 228 etxebizitza egiteak "ez du inongo justifikazio sozialik". Plataformak nabarmendu du, 40 hektareako lur ez urbanizagarria birkalifikatzeko aitzakia bezala erabili dela hotela eta golf zelaia.
Aroztegiako proiektua UPNren gobernuak abiatu bazuen ere, Geroa Bairen gobernuak joan den astean hartutako erabakiaren bitartez, "bidegabekeria" babestea erabaki duela uste dute. "Aldaketaren" Gobernua babestu dutenen alderdien artean. Geroa Baik bakarrik egin du "inposizio" eta "pelotazo" horren alde. Beraz, Aroztegia…eta gero zer? Plataformak galdera bat egin du: noren interesak defenditzen ditu gobernu honek?
Erabaki honekin atzera egin ezean, espediente horren arduradun izan diren Isabel Elizalde (Landa Garapena, Ingurumen eta Tokiko Administrazioko kontseilaria) eta Manu Aierdiren (Nafarroako Gobernuko lehendakari orde eta Ekonomia Garapenerako kontseilaria) berehalako dimisioa eskatu dute plataformako kideek eta Sustrai Erakuntza taldeak.