Kontuen Ganberak presidente berria izanen du heldu den ostailetik aurrera. Egun kargu horretan den Helio Robledak berretsi du bere garaia amaitutzat emanen duela sei urteren ondoren: "Proiektu bat aurrera eramateko onartu nuen kargua eta hori sei urteren buruan amaitutzat ematea izan da asmoa hasieratik". Sei urte nahikoa enbora dela uste du Robledak lan txukuna egiteko. Orain erakundeak ideia berriak izanen dituen presidentea behar duela uste du. "Proiektuarekin gogotsu aritu naiz eta harro nago egindako lanarekin", nabarmendu du.
Datozen egitasmoak, zehaztuak
Hiru lan ildo izanen ditu 2016an Kontuen Ganberak: Parlamentuak eskatzen dizkion ikuskaritza lanak eginen ditu batetik, udal handienetako fiskalizazioa egiteaz ere arduratuko da eta azkenik, legeak arautzen duenaren arabera Nafarroako aurrekontuei buruzko txostena ere eginen du.
Oraingoz 35 txosten inguru baditu egiteko eta urteak aurrera egin ahala sortuko direnak ere beteko ditu.