Uxue Barkos presidenteak eta Maria Jose Beaumont Barne eta Justizia kontseilariak gogora ekarri dute aurreko legealdian onartu zuela jada Nafarroako Gobernuak Foruzaingoa "lehenestea, nahiz eta ez izan bakarra" udal poliziekin elkarlanean aritzerakoan. "Arrazoizko neurria" dela uste dute.
Espainiako Estatuaren Administrazioak helegitea iragarri du Poliziaren Legearen kontra, estatuaren eskumenak "zapaltzen" dituelakoan. Beaumonten arabera, hori ez da hala. "Ez dugu Polizia Legearen bosgarren artikuluan aldaketarik onartu behar", egin du aldarri.
Alderdi politikoen artean, ertz askotariko iritziak daude. Geroa Baik eta EH Bilduk Foruzaingoa zabaldu eta gainontzeko polizia indarrak gutxitzearen alde egin dute; Podemosek, aldiz, "koordinazio hobea" eskatu; UPNk "inor" sobran ez dagoela adierazi du; eta PPNk, ildo beretik, segurtasuna "gakoa" dela aipatu du.