Nafarroako hegoaldeko produktuak kontsumitzaileen eskura jartzen ditu zuzenean Errigora herri ekimenak. Auzolanaren bidez bertako produktuak eskaintzeaz gain, euskara diruz laguntzea du helburu egitasmo honek. Ikastolen Elkartearekin, AEKrekin, Zazpiak Batekin eta Sortzenekin elkarlanean urriaren 21ean abiaraziko dute udazkeneko kanpaina. 50 euroren truke jaso ahal izanen dira saskiak Euskal Herriko hainbat txokotan eta haien barruan ardoa, olioa, melokotoi poteak, piperrak, zainzuriak, orburuak, kardua, potxak, almendrak eta zukua aurkituko ditugu. Urtero bezala, jasotako diruaren %25 euskara ofiziala ez den eremuko euskalgintzako proiektuetara bideratuko du Errigorak.
Azken hiru urteen balantzea
Aurtengo kanpaina ezagutzera ematearekin batera, orain arteko ibilbidea bildu dute bideo batean. Zenbakiei erreparatuz, hiru urtetan 370.000 kontserba ontzi eta 88.000 litro olio banatu dituzte, eta guztira 15.000 etxetara heldu dira. Horri esker, Nafarroa hegoaldeko euskalgintzara 300.000 euro bideratzea lortu dute.
Nafar hegoaldea, euskara eta elikadura burujabetza lotzen dituen Errigora ekimenaren udazkeneko kanpaina aurkeztu zuten Nafarroako Parlamentuan urriaren lehenean.
