Nafarroako Parlamentua osatuko duten herritarren ordezkariekin biltzeaz gainera, gizarte eragile, ekonomiko eta sindikalekin batzartzea ezinbesteko jo du Geroa Baik. Modu horretan, Caritasekin bildu da gaur: “Pobreziaren aurka egiten duen lanaren berri jaso eta euren egoera aztertzea izan da lehen batzar honetako xedea”, azaldu du Uxue Barkosek. Nafarroak bizi duen egoera aztertu eta etorkizunean zein neurri har daitezkeen zehazten aritu direla nabarmendu du Barkosek.
Sintonia onean joan da gaurko bilera Geroa Baiko eledunen ustez. Lehentasunak zeintzuk diren zehazterakoan bat egin dutela nabarmendu du Geroa Baiko presidentegaiak. Koldo Martinezekin eta Isabel Aranbururekin joan da Barkos bilerara. Caritasen ordezkarien artean Angel Iriarte Nafarroako Caritasen zuzendaria izan da.