Madrilen eman duzu asteburua, Podemoseko Estatuko buruekin batzarturik. Zertaz mintzatu zarete?
Ostiralean Pablorekin [Iglesiasekin] bilera izan genuen erkidegoetako idazkari nagusiok, eta komentatu genuen zein zen egoera leku bakoitzean, eta zein pauso egin zitezkeen. Larunbatean, Herritarren Kontseilu Estatala izan genuen, hainbat gauzaren inguruan eztabaidatu genuen eta barne arautegiko hainbat puntu onartu genituen. Oso eztabaida luzea izan zen.
Nola dakusate Nafarroako egoera Madrilen?
Pozik daude emaitzekin. Aitortu dezakegu hainbat beldur zituztela, eta emaitzak lasaigarriak izan direla. Lortu dugu pisu nahiko gauzak baldintzatzeko, baina ez gehiegi. Azken finean leku guztietan arazo bera daukagu: alderdia oraindik sendotu behar dugu. Pausoak egin behar ditugu horretarako. Botere instituzionalak ez du deuserako balio baldin eta atzean laguntzeko pertsonak ez badituzu.
Ezerezetik abiaturik 45.848 boto eta 7 parlmentari lortu dituzue. Zer balorazio egiten duzue?
Emaitzak ontzat ematen ditugu. Guk 40.000 euro inguru gastatu ditugu kanpainan. Besterik ez. Eta gertuko beste indar batzuek, Geroa Baik oker ez banaiz, 250.000 euro inguru gastatu dituzte, faroletan, autobus geltokietan eta abar. Gure balorazioa da geneuzkan bitartekoekin lan txukuna egin dugula, jendearekin kontatu dugulako. Baina oraindik asko ikasi behar dugu. Adibidez, ekitaldi asko herri txikietan egin ditugu, eta horrek ez du fruiturik ematen. Hasieran hobe da herri eta hiri handiagoetan jardutea.
Emaitza hobeak lor zenitzaketela uste duzu, beraz.
Ez dakit. Hori politika fikzioa da. Denbora falta izan zaigu gauzak hobeki prestatzeko. Denbora gutxi izan dugu dena antolatzeko. Larunbatean, Madrilen, Carolina Bescansak analisi interesgarria egin zuen: boto aldaketa errazago gertatzen da hiri handietan herri txikietan baino, gazteek errazago aldatzen dute botoa helduek baino... Badakigu gauzak ez direla egun batetik bestera aldatzen. Denbora behar dugu.
Atzo bilera egin zenuten Geroa Bairekin. Horren ondotik “oso baikorra” zinela esan zenuen. Zergatik?
Batez ere, aldaketaren aldeko indarren artean 26 parlamentari lortu ditugulako, eta horrek aldaketa gauzatzeko bidea irekitzen digulako. Baina gero zehaztu behar dugu aldaketa nolakoa izanen den. Neurri zehatzak mahai gainean jartzen ditugunean ikusiko da noraino iristeko kapazak garen. Guretzako zerga erreforma progresiboa oso garrantzitsua da, zorraren auditoria... Aldaketa ekonomikoak garrantzitsuak dira, gero politika sozialak egin ahal izateko.
Hauteskunde kanpainan esan zenuen EAJrekin arazoak eduki zenitzaketela zerga erreforma adosteko. Orain zer diozu?
Eskatu genien zerga erreformarako haien proposamen zehatza emateko, alderaketa egin ahal izateko. Ikusi beharko dugu haiena, eta EH Bildurena, eta Izquierda Ezkerrarena, eta denona, eta ikusi beharko dugu zeinekin lor daitekeen diru gehiago, zertan datzan proposamen bakoitza.
Mintzatu al zineten Abiadura Handiko Trenaz?
Ez, ez zen atera, baina gai garrantzitsua da. Zirkuluak orain eztabaidatzen ari dira zeintzuk izan behar duten gure marra gorriak. Hau horietako bat izan daiteke. Bileran, hainbat gai jarri genituen mahai gainean. Adibidez, Hipotekak Kalteturikoen Plataformak proposaturiko akordioa nola bete; izan ere, hamar puntuetatik bat guk ez dugu egingarri ikusten. Urriaren 15erako Nafarroan txirotasun energetikoarekin amaitu behar dela dio puntu horrek. Horregatik izan genituen arazoak sinatzeko. Galdetu genien nola bete daitekeen hori. Kontuen Ganberaz ere hitz egin genuen, zorraren auditoriaz...
Aurrerantzean negoziazio bilerak aldaketaren aldeko talde guztiek batera egitea proposatu duzue. Zer dela kausa?
Eraginkorragoa izan dadin. Haiek hor PSN ere sartu nahi zuten. Guk erantzun genien ez genuela arazorik izanen. Mahai horretan jartzen badira, haien kontraesanak agerian geratuko dira. Baina guk ez dugu ikusten PSN aldaketaren aldeko indar bezala. Bestalde, bilera horiek streaming bidez zabaltzea eskatu genuen, jendeak jakin dezan batzuek eta besteek zer proposatzen duten, zer esaten den, nork esaten duen. Hori gardentasun osoz egin dadin.
Baina halakoetan sukalde lana ez al da ezinbestekoa?
Izan daiteke, bai, baina sukalde lana ez dakit zenbateraino ezin den publikoki egin. Jendeak jakin behar du zer dagoen hor.
Zer nahiago duzue, Gobernuan egon ala ez egon?
Ez dugu batere argi. Joan ginen Ahal Dugu-ren lau ordezkarion artean ez gaude ados, ikuspegi ezberdinak ditugu. Guk lehendabizi ikusi behar dugu programarekin noraino iristeko kapazak garen, eta nola berma daitekeen hobeki programa hori beteko dela. Gobernuan sartzen bazara, gero leiala izan behar duzu gobernu krisirik ez eragiteko, eta hori ongi neurtu behar da. Gobernuan egotea egoteagatik ez zaigu interesatzen. Guk hasiera batean eskatzen genuen Gizarte Politika, Etxebizitza eta Enplegu lehendakariordetza sortzea, ez mugatzea departamentu batera. Baina horrek ez du deuserako balio gero baliabide ekonomikorik ez badago lehendakariordetza horrek politikak garatzeko.
Madrilen zer nahiago dute, Gobernuan egon ala ez egon?
Madrilen orokorrean oso argi dute, ez bakarrik Nafarroarako baizik eta toki guztietarako: ez dute sartu nahi gehiengoa ez duten gobernuetan, bestela politika zaharreko rolak errepika daitezkeelako, gobernuaren makulu bilaka daitezkeelako. Ez zaizkigu eserlekuak interesatzen baizik eta politikak gauzatu ahal izatea. PP kanporatu ahal izateko hainbat lekutan Podemosen abstentzioa behar dute, eta abstentzio hori garesti aterako zaie. Mahai gainean hainbat neurri jarriko dira. Atzo Barkosek esan zigun ez eskatzeko legez kanpoko neurririk. Geroa Bairen arabera guk Andaluzian eskatu duguna, Administrazioak diru konturik ez edukitzea jendea etxetik kaleratzen duten bankuetan, legez kanpokoa da. Niri guztiz zentzuzkoa iruditzen zait.
Gobernutik at geratuz gero, bermatuko zenukete aldaketaren gobernuaren egonkortasuna?
Jakina. Gu gobernutik kanpo egonen bagina ere, leial izan gintezke. Parlamentuan politika berreskuratu behar da. Ematen zuen Gobernuak nahi zuena egin zezakeela Parlamentuaren oposizioarekin. Nahi genuke Parlamentuak bere papera berreskuratzea. Kontua da oraindik begiratu behar dugula nondik egin daitezkeen hobeki gauza hauek.
Ahal Dugu Gobernuan egoteak garrantzi sinbolikoa edukiko luke identitateari doakionez, ez dezaten esan abertzaleen gobernu bat dela. Zer deritzozu horri?
Gu prest gaude edozertarako, baina agian erantzuna ez dugu guk baizik eta gobernu osatzeko prozesuan buru direnek. Prest baldin badaude benetako aldaketak egiteko egin ditzatela. Negoziazioetan ikusiko dugu noraino iristen garen. Baina guretzako aldaketa ez da bakarrik aurpegi aldaketa bat, baizik eta politika ekonomikoak aldatzea. Hori egiten bada, aurrera eginen dugu edozerekin. Eta barruan egotea hobe baldin bada, hori ere egin daiteke. Baina zer gertatuko da akordioak betetzen ez badira? Isilik egon beharko dugu Gobernuan gaudelako, oposiziorik egin gabe hor barruan gaudelako? Edo gobernu krisi bat sortu beharko dugu, UPN eta Diario de Navarra hor zain egonda?
Barcinak Madrilen, TVEn esan du egungo Nafarroak Hitlerren aurreko Alemania dakarkiola gogora. Zer iruditzen?
Horrek agerian uzten du egiazki nolakoak diren. Hauek demokratak dira irabazten duten bitartean. Ez dutenean irabazten, ikusten da nolakoak diren, maskara kentzen dute eta agerian geratzen dira. Lotsagarriak dira.
El Mundo-k atzo argitaratu zuen Uxue Barkosek bilera egin zuela ETAko kide izandako Guillermo Goikoetxearekin. Barkosek dio aspaldiko kontua dela, eta Sortuko ordezkari moduan elkartu zela berarekin. Zer iruditu zaizkizu albistea aurkezteko modua, unea, asmoa?
Badakigu nolakoak diren hedabide hauek. Prest egon behar dugu halakoak eta gehiago jasotzeko. Presioa egiten dute batetik eta bestetik. Beldurra ematen didate, gero honek badituelako bere ondorioa. Esate baterako, Barcinak esan zituenak esan eta gero, pertsona bat egoitzara etorri zitzaigun oihuka. Asko neurtu beharko lukete zer esaten duten.