Hildakoak bi valentziar dira. 57 urtekoa, bata; 37koa, bestea. Virto enpresaren industria-nabe berria eraikitzen ari ziren, Develood azpikontrataturiko eraikuntza enpresarekin. 11:00ak aldera, garabi baten gainean ari ziren lanean, 50 metroko alturan, eta halako batean garabia erori zen, oraindik argitzeko dauden arrazoiak direla kausa. Anbulantzia bertaratu zenerako, biak hilda ziren.
ELA, LAB, STEILAS, EHNE eta Hiru sindikatuek elkarretaratzea egin dute gaur 12:30ean, Nafarroako Gobernuaren Lan Departamentuaren egoitzaren aitzinean, Tomas Caballero plazan.
ELAk doluminak adierazi dizkie hildakoen senide eta lagunei. Prentsa ohar baten bidez salatu duenez, “Nafarroan lan munduan egin diren politikek behin-behinekotasuna areagotu dute eta lan istripuen arazo latza handitu”.
LABek “doluminak eta elkartasuna” adierazi dizkie “senideei, lagunei eta langileriari oro har”. “Lotura zuzena dago azpikontratazioaren, behin-behinekotasunaren eta istripu honen artean. Horiexek izan dira istripu latzaren eragileak”, salatu du sindikatu abertzaleak. Halaber, gogor kritikatu du UPN, PSN eta PPNren jarrera; izan ere, “iritzi publikoaren aitzinean ongi geratze aldera kanpaina bertan behera utzi dute, baina ez dute deus egiten arazo honekin amaitzeko”.
CCOO sindikatuak iragarri du salaketa aurkeztuko duela istripu honen kontura, “behar bezala iker dadin gertaturikoa, eta ardurak argi ditzaten”. UGTk ere ikerketa xehea egin dadila exijitu du.