Gasteizen egin dute agerraldia gazte auzipetuetako batzuk eta Iruñean elkarretaratzean bildu dira hainbat herritar. Euskal Herria nazkatuta dagoela ohartarazi dute eta egoera honekin amaitzeko eskatu. Gazte auzipetuek nabarmendu dute atzo kaleratutako sententzia eta horren ondorioz eman ziren atxiloketak ez direla soilik euren kontrakoak; "Euskal Herrian bizi garen herritarren kontrako erasoa da".
Gazteek, ehunka lagunek babestuta, adierazi dute ez dutela sententzia onartzen. "Estatuaren estrategia errepresiboaren" ondoriotzat jo dute. Azpimarratu dute militante politikoak izate hutsagatik atxilotu, torturatu eta espetxeratu zituztela.
Iruñean elkarretaratzean bildu dira hainbat herritar, babesa emanez auzipetuei. Kezka, urduritasuna eta kexa izan dira nagusi bildutakoen artean. Epaiarekin ez daudela ados nabarmendu dute eta eskatu, jarduera politikoengatik epaitzen ari dituztenei absolbitzea baino eza dela geratzen, ez dutela besterik onartuko. "Egoera errepresiboarekin" amaitzeko ordua dela ere nabarmendu dute.
Mobilizazio deiak
Atzo atxilotu zituzten kartzela zigorrarekin zigortutako zazpi gazteetatik lau; beste hiru libre daude oraindik. Sententzia onartezina dela uste dute gazteek. Horregatik, "herri gisa" erantzuteko deia egin dute, eta mobilizazioak iragarri dituzte maiatzaren 16 eta 17rako. Euskal Herria "libreago bat" eskatzeko eta kartzelarekin zigortutako zazpi gazteei babesa emateko izanen direla zehaztu dute.
