Iruñeko Udalak trafikoaren ordenantzaren aldaketa onartu berri du. Minusbaliatuen txartelak nola banatu zehaztu dute. Aldaketa horri esker, gida baimenik ez duten ezinduek ere aukera izanen dute txartela jasotzeko. Txartel horiek gainera ez dute zertan auto zehatz batzuetako matrikularekin lotuta joan eta itsuei ere bideratuko dizkete.
Urtebeterako diren txartelak bi urterako eska daitezke ordenantzaren aldaketari esker. Elbarriak garraiatzeko kotxe edo auto berezientzat ere eska daiteke txartela, baina horiek bai, matrikularekin lotura izanen dute. Elbarritasunen bat duten kideek eskura dezakete txartela, minusbaliatuen baremoan zazpi puntu baldin badituzte gutxienez.
