Esako urtegia handitzeko lanek kezka handia eragiten diete zangozar gehienei. Zehazki, %81 kezkaturik daude Esako lanen inguruko gorabeherekin, eta herritarren erdiak baino gehiago beldurturik bizi dituzte lanok, eta haien kontra daude.
Urtegiaren handitzearekiko jarrera finkatzeko tenorean ideologia erabakigarria da: eskuindarren artean gehiago dira proiektuaren aldekoak; eta ezkertiarren artean, kontrakoak. Adina edo generoa bezalako faktoreak ez dira horren garrantzitsuak.
Ikerketa Josetxo Beriain irakasleak zuzenduriko ‘Aldaketa dinamikak gizarte moderno aurreratuetan’ izeneko master ikastaroaren karietara egin du Xabier Errea 28 urteko soziologoak, eta 137 orrialdeko lan horrekin 9,5eko nota jaso du, Diario de Noticias egunkariak argitaratu duenez.
