Nafarroako Parlamentuak Gizarteratze Errentaren Legean egin duen aldaketa ez da nahikoa bazterketa egoerei aurre egiteko. Hala salatu du Oinarrizko Errentaren aldeko Plataformak. "Laguntza jasotzeko eskubiderik gabe geldituko da jende asko", kritikatu dute plataformako kideek.
PSNri kritika, EH Bildu, Izquierda-Ezkerra eta Geroa Baik egina zuten proposamena leundu eta murrizketak "inposatu" dituelako. "Pertsonekin jolasean dabiltza, pobreziarekin espekulatzen". Iñigo Alli Gizarte Politiketako kontseilariaren jokaera ere kritikatu dute legea aldaketak eraginen lukeen kostu ekonomikoa azpimarratu duelako pobreziari aurre egitea lehenetsi beharrean.
Nolanahi ere, eta kritikak kritika, legea aldaketa aurrerapauso jo du Oinarrizko Errentaren Plataformak, eta administrazioaren babesik gabe gelditzen diren herritarren alde lanean jarraitzeko konpromisoa berretsi du.
