Ikasleak klasean ditugu, eta udazkena ate-joka. Liburuak, lagunak, irakasleak, etxerako lanak, goiz altxatzea … horiek guztiak urteroko kontuak dira, ongi baino hobeki geureganatuak ditugunak.
Aurten , berrikuntza handia dugu Nafarroako Irakaskuntza ez unibertsitarioan: hezkidetza plan berria abian da. Dotore eta arrakastatsuak izan dira Baluarten egin berri diren bi eguneko jardunaldiak. Nafar Gobernuko ordezkariak pozez beterik, irakasleak gogotsu, euren jarduna eraldatu eta hobetsi nahian.
Begi-bistako ondorioa, hitz gutxitan laburtzen ahal dugu: hamaika arrazoi ditugu eskola hezkidetzailea izan dadin. Txalogarria. Bazen garaia!
Ez da honelako planik abian den lehenengo aldia. Aurrekoa hiltzen utzi zuen UPNk. Orain, berriz, hezkidetza plan iraunkor eta derrigorrezkoa izan dadin aldeko jarrera irmoa dago Gobernuan.
Familiak eta ikasleen parte-hartzea nola sustatu ari dira definitzen. Ezinbestekoa da lankidetza. Hezkuntza sistema berdintzaile eta hezkidetzailea izango bada, komunitate osoaren inplikazioa behar da.
Patriarkatua boteretsua da, eta denok bat egin behar dugu berdintasunaren aldeko borrokan. Begira diezaiogun geure buruari, denok baitugu zer aldatu, zer ikasi.
Euskal Herria Irratiak ere gaur lehenengo eskola eguna du. Hemen ere izanen dugu zer ikusi, zer ikasi, zer aldatu, baina batez ere zer aditu.
Nik garbi dut: Irrati hezkidetzailean ari gara. Chapeau!
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!
