Euskararen ofizialtasuna eskatzeko hamaikagarren elkarretaratzea izan zen bart Iruñeko Sarasate pasealekuan. N-garrenez izanik ere, gogorarazi behar baita oraindik ere nafarron hizkuntza eskubideak urratzen direla; eremu ez euskaldunean bizi den nafar euskal hiztun batek ez dituela bere oinarrizko eskubide guztiak aitortuak hizkuntza propioaren erabilera mugatzen bazaio. Edo administraritzarako sarbidean merezimenduen aitorpenari dagokionez zer esan, euskara jakiteak zenbait kasutan kaltetu ere egin bazaitzake beste erdal hiztun batek dituen aukeren parean.
Ez nuke erabateko ziurtasunarekin esango Euskara galzorian dagoen espezie bat denik, gaur egun bederen, baina bai eraso eta oztopo ugari egunero jasaten dituena. Eta neure buruari galdetzen diot ea gaur egun hain hedatuak dauden ekologismoaren, bioaniztasunaren defentsaren edo kontserbazionismo klimatikoaren baitan hizkuntza gutxitu baten defentsa ez ote litzatekeen ere sartuko. Kontzeptuak nahiko parekoak dira, bi aktibismoek bilatzen dute galzorian edo mehatxupean dagoen zerbait babestea.
Eta ez diot aktibismo klimatikoari garrantziarik kendu nahi, baina esanen dut batzuek sutsuago defendatzen dituztela hego poloko pinguinoak bere auzoko euskal hiztunak baino.