Euskararen Legea eta Nafarroako Administrazioetako Langileen Estatutua aldatzea, bereizkeriak amaitzeko

Erabiltzailearen aurpegia adm.euskaraz.taldea 2021ko urr. 10a, 20:44
Hauxe dio Gutxiengoen Hizkuntzen Europako Gutunaren 7.2 artikuluak: “Erregio edo gutxiengoen hizkuntzetako hiztunen eta gainontzekoen arteko berdintasuna lortu asmoz edo hizkuntzan egoera berezia kontutan izan dadin hartutako aldeko neurri bereziak, ez dira indar handiagoko hizkuntzetako hiztunen kaltetan egindako bereizkeriatzat hartuko”.
EUSKARAREN LEGEA ETA NAFARROAKO ADMINISTRAZIOETAKO LANGILEEN ESTATUTUA ALDATZEA, BEREIZKERIAK AMAITZEKO


Hauxe da talde parlamentarioei Administrazioan Euskaraz Taldeak egindako proposamena, Euskararen Legea aldatzeko, eremu mistorako 17. artikuluan hurrengo pasarteak gehituta:

“Ez dago lanposturik jendearekin noizbait harremanik ez duenik. Beraz, Administrazioen ahalmena da lanpostuen artean lehentasunak ezartzea, inolako mugarik gabe. Lanpostu batean euskaraz jakitea eskatzea ezin da inolaz ere diskriminaziotzat jo.

Euskaraz jakitearen merezimendua ezartzea zerbitzu elebiduna eskaintzearekin lotuta dago. Beraz, Administrazioen ahalmena da horri zenbateko garrantzia ematea. Horrexegatik, lanpostu batean euskaraz jakitearen merezimendua ezartzea edo Plantilla Organiko osoan euskaraz jakitearen merezimendua ezartzea ezin da inolaz ere gehiegizkotzat edo desproportzionatutzat jo”.

Epaileek edo Nafarroako Administrazio Auzitegiak, Euskararen Legea gaizki aplikatuta, administrazioei eskuak lotu dizkiete lanpostuei hizkuntz profilak jartzeko edo euskara merezimendu gisa puntuatzeko. Horrexegatik, Legea hobeto zehaztea eskatu dugu, ez dadin errepikatu Zizur Nagusiko, Berriobeitiko, Antsoaingo, Berriozarko, Atarrabiako, Uharteko eta Lizarrako Udalekin, gertatutakoa, eta baita Nafarroako Gobernuarekin berarekin ere.

Hauxe dio Gutxiengoen Hizkuntzen Europako Gutunaren 7.2 artikuluak: “Erregio edo gutxiengoen hizkuntzetako hiztunen eta gainontzekoen arteko berdintasuna lortu asmoz edo hizkuntzan egoera berezia kontutan izan dadin hartutako aldeko neurri bereziak, ez dira indar handiagoko hizkuntzetako hiztunen kaltetan egindako bereizkeriatzat hartuko”.

Artikulu hori Espainiako Estatuan indarrean egon arren, epaileek muzin egiten diote.

Era berean, Nafarroako Administrazio Publikoetako Langileriaren Estatutuan langile euskaldunek jasaten duten bereizkeria zuzentzea eskatu diegu, 33.2 artikulua ezabatuta:

”Hautapen probak gainditu eta Nafarroako Administrazio Publikoetako edozeinetan, euskara edo Europar Batasuneko edozein hizkuntza jakin beharra duten lanpostuetan sartzen direnek, handik aurrera, beren administrazio publikoan hutsik dauden eta hizkuntza hori jakitea nahitaezkoa duten lanpostuak betetzeko deialdietan baizik ez dute parte hartzen ahalko”.

Espero dezagun talde parlamentarioek ongi ohartzea bereizkeria non dagoen.

2021-10-10.

ADMINISTRAZIOAN EUSKARAZ TALDEA.


EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!