Zaintza eskubide kolektiboaren alde eta hori bermatuko duen zaintza sistema publiko-komunitario baten alde deitu du greba orokorrera mugimendu feministak, azaroaren 30erako. Ez da erronka makala: batetik, grebara deituta guztiok egonen garelako, ez soilik emakumeak*. Eta, bestetik, zaintza bera hain feminizatuta eta zokoratuta dagoen gaia delako.
Eta ez da gauza txikia greba orokor bat deitzea, zer eta zaintzaren alde. Beno, ba Euskal Herria pertsona ausartez beteta dago eta haietako asko mugimendu feministako kideak dira. Ze, gutxi hitz egiten da, baina: zaintzaren lan-karga eta emakumeen lan, enplegu eta egunerokoan izugarri eragiten duen gaia da; gutxi hitz egiten da, baina: guztiz feminizatuta, prekarizatuta eta pribatizatuta dagoen lana da zaintzaren inguruan mugitzen dena, zer esanik ez esklabotasunetik hurbil dagoen etxe barneko erregimenez ari bagara; gutxi hitz egiten da, baina emakumeok debalde eta maitasunagatik zaintzera garamatzan sistema batean bizi gara, beste batzuek beste alde batera begiratzen duten bitartean.
Ez gaude konformatzeko prest, bai bidea egiteko. Azaroaren 30a izan dadila aldaketa askoren hasiera.