Nafarroako Gobernuaren hondakinen plana herritarren partehartzera irekia dago garai honetan. 2017-2027ko hamarkada aurreikusten du. Irakurritakoak pozarren jarri nau. Aitortuko dut, sentibera nabil hondakinekin.
Kontua da, astean behin edo birritan Lasartera joaten naizela lanera. Handik kilometro batera errauskailu bat jarriko dute 2019rako. Geldiarazten ez bada, beraz, hiru urte barru Zubietako erraustegiaren dioxinak irentsiko ditudala saldoka. Aire mokadu bakoitzean milioika molekula dioxina.
Zein da afera? Gipuzkoan ezinbestekoa dela erraustegi bat eta Nafarroan ez. Hemengo hondakinen planak ez du erraustegirik aurreikusten. Han beharrezkoa da eta hemen ez. Antzeko biztanleria dute biek: Gipuzkoak 700.000 pertsona, Nafarroak 640.000. Batean ez da etorkizunik erraustegirik gabe eta bestean etorkizuna erraustegi eza da. Are gehiago, batean agintari nagusia EAJkoa da, eta bestean Geroa Baikoa, EAJ bere baitan hartzen duen koaliziokoa. Nola liteke?
Azalpen asko ditu gaiak, baina ez didazue esango kontrastea ez dela txantxetakoa. Zorionez, kontraste pozgarri eta osasungarria nafarrentzat. Gosari on, entzule!
