Ikasi du hitz egiten, ikasi du hitz egiten! Txiki-txikitatik hitzak josten irakasten digute esaldiak osatzeko eta esaldiak josten testuak sortzeko. Denborarekin konturatzen gara esateko eta kontatzeko beharra dugula, baina, horretarako ez dela nahikoa hitzak eta esaldiak josten jakitea. Esaten eta kontatzen ez digula inork irakatsi ohartzen gara, ezpainak, emozioak, desirak, beldurrak, haserreak, poza eta memoria josita izaten ditugula; eta isildu egiten gara edo ez dugu ezer esaten. Dena hitzez esan beharrik ere ez dago, ordea, ahotsak josteko ere, emozioak, desirak, beldurrak, haserreak, poza eta memoria kontatzeko badaude beste modu batzuk.
Azken bi hilabeteotan jaso dut arpillera egileen berri. Txilen dute jatorria, Pinocheten diktadura garaian. Emakumeek orratz, hari eta oihalen bidez egiten zuten gertatzen ari zenaren kontaketa. Giza Eskubideen urraketen aurkako salaketa-oihu bihurtu ziren arpillerak, etorkizuna josteko beharrezkoa den memoriaren transmisio gune.
Ostegunetik aurrera Nafarroako Gobernuko Bakearen, Bizikidetzaren eta Giza Eskubideen Zuzendaritza Nagusiaren eta Conflict Textiles-en eskutik “ARPILLERAK: MEMORIAREN HARITIK ETORKIZUNA JOSTEN” erakusketa egongo da ikusgai Baluarten. Txile, Argentina, Kolonbia, Peru, Ingalaterra, Ipar Irlanda, Alemania eta Espainian dute jatorria erakusgai izango diren arpillerek, gatazka egoeren eta giza eskubideen urraketen kontaketa egiten da horien bidez. Ahots josi horiek memoriarentzako eta justiziarentzako ekarpenak dira. Ekimen oso interesgarria jarduera ezberdinekin osatua datorrena.
Ez da proposamen txarra barne mundu emozionala josiegi duen gizartearentzat; propsamen polita da… kanporantz josi barne korapiloak askatzeko…
Irati Goikoetxea
2018-4-10
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!
