Benjamin Franklinek idatzi zuen “Zoriontsuak gara erregerik hoberenaren menpe biziz” eta Thomas Jeffersonek gaineratzen zuen “amerikanoek ez dute ez gogo, ezta interesik ere, monarkiatik kanpo bizitzeko”. Bien testuak 1776. urte hasierakoak dira. Urte bereko udan Independentziaren Adierazpena bultzatu zuten eta Ipar Amerikako iraultza prozesua hasi zen. Garaiko inork ez zuen zetorrenaren susmorik antzeman, ezta protagonista nagusiak izango zirenak.
Etengabe errepikatzen den fenomenoaren adibidea da. Datorrena ez da asmatzen, aurreikuspenek huts egiten dute. Azken urte hauetan bizi izan ditugun gertaerek ederki ilustratzen dute esandakoa: finantzen krisia, Brexita, Kolonbiako erreferenduma, Espainiako alderdien inplosioa…
Okerrera goaz “komunikazioaren gizartean”. Testu hiperlaburrak nagusitu dira, emozio pertsonalek iritzia balidatzen dute, berehalakotasuna da arrakastaren giltza, guztiok gai guztien kontura uste sendoa dugula sinesten dugu. Horrela, oso konplexua denaren aurrean gero eta begirada ergelagoa egiteko joera dugu.
