«Nazioarteko Giza Eskubideen egunean, Audientzia Nazionalak inputatu gisa deklaratzera deitu nau». Halaxe jakinarazi du abenduaren 11an Mikel Zabaleta Aramendia Leitzako alkateak. Hitzordua abenduaren 21ean da, eta akusazio oso larriak dira, pestetako programan idatzi zuen alkatearen agurrarengatik: Terrorismoaren gorazarrea, prebarikazioa eta malbertsazioa.
Mikel Zabaleta alkateak adierazi duenez, «nere delitua: Pestetako programan, alkatearen agurrean, nere iritzia eman izana. Besteak beste, Torrea Elkarteari egin dioten konfiskazio bidegabea salatzeagatik. Adierazpen Askatasunaren aurkako beste eraso larri bat dela iruditzen zaigu. Ez da kasualitatea, ongi planifikatutako jazarpen politiko kanpaina bat baizik».
Datozen egunetan deialdiak deituko dira, egoera hau salatzeko, eta Adierazpen Askatasuna aldarrikatzeko. Leitzako alkatearen esanetan, «bertan ahal dugun guztiok parte har dezagun garrantzitsua da. Izan ere, inputazioa niri egiten badidate ere, ez da gai pertsonala delako, Leitzako alkatea naizelako baizik, eta zehazki, EH Bilduko zerrendatik aukeratutakoa».
