Hemendik aurrera, euskara erabiltzeko eskubidea errespetatu ez bazaio edo euskara erabiltzeagatik kaltetua izan bada, herritarrak kexa jarri ahal izango du momentuan bertan aplikazio berriaren bidez. Era berean, hizkuntza eskubideak bereziki ondo zaintzen dituzten entitateen jokabide eredugarria txalotu eta zoriondu ahalko du.
Aplikazioa sakelakora deskargatu eta erabiltzaile bilakatu besterik ez da egin behar zerbitzua eskura izateko —Euskararen Telefonoaren erabiltzailea izanez gero, aplikazioa jaitsi eta haren erabiltzailea eta pasahitza sartu behar dira—. Beste herritarrek Behatokiari helarazi dizkien gertaerak ikusteko eta sare sozialetan partekatzeko aukera ere eskaintzen du Akuilarik.
"Euskaraz bizitzeko hautua egin duten pertsonak errealitatean aurkitzen dituzten oztopoak gainditzen saiatzen dira, zailtasunei aurre egiteko prest daude eta saiatzen dira egoera hori hobetzeko zerbait egiten", adierazi du Garbiñe Petriati Hizkuntz Eskubideen Behatokiko zuzendariak. Horretan laguntzeko, eta garai berrietara egokitzeko ahaleginaren fruitu da azken proiektua. Euskaraz bizitzeko ahalegina egiten dutenei eta egin nahi duten herritar guztiei euren inguru hurbilean aldaketak sustatzeko tresna da Behatokiak eskaini duena.
