Iragan azaroaren 2an, Nafarroako Legebiltzarreko Mahai eta Eledunen Biltzarrak lehen pausoa eman zuen, eutanasiaren aldeko mozioa tramiterako onartuta. Gaur, berriz, parlamentu osoa izan da erabakia berretsi duena, Geroa Bai, EH Bildu, Ahal Dugu eta Ezkerraren aldeko botoekin.
Koldo Martinez Geroa Baiko legebiltzarkideak aurkeztu du mozioa, eta bertan, eskaera bana egiten zaie Espainiako eta Nafarroako gobernuei. Zehazki, Zigor Kodearen 143. artikulua moldatzeko galdegin dio legebiltzarrak Madrili, eutanasia eta suizidio lagunduari delitu izaera kenduta, zigorgabetu ditzan. Nafarroako Gobernuari, berriz, foru lege berri bat garatzeko eskaera egin dio, "duintasunez hiltzeko eskubidea arautzeko".
UPNk hala eskatuta, mozioa puntuz puntu bozkatu dute legebiltzarkideek. Lehenbiziko puntuan (Espainiako Zigor Kodea aldatzeko eskaera), PSNren babesa ere izan dute gobernua osatzen duten taldeek. Bigarrenean, aldiz, Geroa Baik, EH Bilduk, Ahal Dugu-k eta Ezkerrak bakarrik eman dute aldeko botoa. PSNko Maria Txibiteren aburuz, "ez du zentzurik eutanasiari buruzko foru lege bat aurkezteak, jakin baitakigu Espainiako Gobernuak atzera botako duela".
