Zeelanda Berriko atentatu faxistaren egileak kamera bat aldean zuela hil zituen 50 lagun joan den astean. Ez dut bideoa ikusi, baina ez da izan aukera faltagatik: sare sozial publiko eta pribatuetan erraz aurki daiteke talde-hilketaren sekuentzia oso-osorik. Bideo-joko baten estetika imitatzen duen plano subjektiboan grabatuta egoteak izango zuen zabalkunde horrekin zerikusirik, segur aski: belaunaldi digitalen kode estetikoak bere egin ditu hiltzaile neonaziak; ikus-entzunezko hizkera horrek indar handiagoa du irudien gainean egin daitekeen irakurketa ideologikoak baino. Kasik fikziozko obra gisa ikusi daiteke, errealitatea geroz eta mediatizatuagoa den mundu honetan.
Nolanahi ere, ez dago gaizki berriz ere gogora ekartzea: faxismoak terrenoa irabazten du haren kontra borrokatzen ez bada. Eta kasu honetan, faxismoa borrokatzeko modu eraginkorrena, naziek euren ekintzen propaganda egiteko grabatu zuten bideoa ez zabaltzea da.
