Mintzalagun, Berbalagun, Mintzakide, Solaskide, Solaslagun… herrien eta euskalkien arabera izen ezberdinak hartzen dituzte Mintzapraktika programetan parte hartzen duten kideek. Baina zer dira Mintzapraktika programak? Euskaraz aritzeko biltzen diren lagun taldeak osatzen dituen egitasmoa. Oinarrizkoa dirudi, eta akaso soiltasun horretan dago bere arrakastaren gakoa.
Iruñerrian talde andana osatu dira azken bi hamarkadetan, milaka eta milaka lagunek izan dute aukera euskaraz aritu eta biltzeko, dagoeneko erraldoia den sare horren parte izateko. Gaur, talde horietako bat gurera ekarri dugu Monika Olmos, Ruben Valencia, Joseba Perkaz, Agustin Armendariz eta Jon Subijana mintzalagunek osatzen dutena. Arrazoi desberdinengatik eman zuten izena ekimenean, baina denek ala denek bat egin dute gauza batean: harremana euskaraz eraikitzen denean, euskaraz bizitzeko aukerari atea zabaltzen zaio.
