Bilera hasi eta hamar minutu eskasera sindikatuak altxatu dira Hezkuntza Departamentuaren negoziatzeko asmo falta dela eta. Departamentuak helarazi nahi zizkien proposamenak entzun gabe alde egin dutela adierazi du Gimeno kontseilariak eta bestaldean, haren interlokuzio falta salatu dute sindikatuek.
Bileraren gai-zerrendarekin desadostasuna adierazita, STEILAS eta LAB sindikatuetako bozeramaileak izan dira joateko bidea ireki dutenak. Nafar Gobernuak ohar batean jakinarazi duenez, Hezkuntza Departamentuak Hezkuntzako Mahai Sektorialaren bilera deitu zuen, gai-zerrendan honako bi puntuak jasota: sindikatuen aldarrikapenak aztertzea; eta irakaskuntza indartzeko 1.001 ordu banatzeko akordioa sinatzea, Nafarroako 41 ikastetxetan irakasleak kontratatzeko.
Grebara eraman dituzten arrazoiak zeintzuk diren galdetu die berriro kontseilariak. Gainera, "inolako proposamenik gabe etorri da, eta bileratik alde egin dugu sindikatu guztiok batera", azaldu du Steilasek. Bozeramaileek ikasgela bateko ratioak irudikatu dituzte "Gimenok irakasleon eguneroko ratioak ikusteko".
Bere aldetik kontseilariak otsailean aipatutako datuak ekarri ditu gogora: “Kostuaren kuantifikazioak ezinezko egiten dute eskaeren gauzatzea”. “Bakarrik ratioen murrizketa linealak 131 milioi euroko kostua izango luke", gaineratu du Gimenok.
