Apirilaren 23an Liburuaren eta Lorearen Nazioarteko egunean Iruñeak azoka eginen du kalean: Karlos hirugarrena eta Orreaga kaleen artera hemezortzi postu jarriko ditu liburuz josiak eta beste bi postutan sei argitaletxe izanen dira lehenengoz. Liburuek %10eko deskontua izanen dute eta loreak euro batean eskuratzen ahalko dira. Koldo Martinez Promozio Ekonomikoko Iruñeko Udaleko zinegotziak esan du berezia izaten dela egun hori: "Munduko kulturek bat egiten dute bertako saltokiek duten eskaintzarekin kalean". Eskaintza zabala izanen da aurten ere: "Gazte zein helduengana, bereziki irakurzaletasuna oraindik euren bizian txertatua ez duten horiengana iristeko aukera ematen du kalera ateratzeak", esan du Martinezek.
Azoka horretan idazleak ere gerturatuko dira liburuak sinatzera. Mireia Maldonado, Ester Ortiz, Jon Aramendia, Idoia Saralegi, Maite Sola edo Jokin Azkena izanen dira, besteak beste.
Liburuez gain, larrosak ere salduko dituzte: "Euro baten truke eskuratzen ahalko dira. Diru hori liburu bilakatuko dute gero eta liburu horiek Cocemfe elkarteari emanen zaizkio", azaldu du Martinezek. Iaz hasi zuten ekimen hori. Paris 365 taldeari helarazi zizkioten loreen salmentatik ateratako diruarekin eskuratutako liburuak.