Badirudi zerbitzuak iritsi direla Erripagainara. Lau udalerritan banatzen da auzoa Iruña, Burlata, Uharte eta Eguesibar, eta orain, Osasunbideak iragarri berri du Erripagainako osasun-etxe berriaren obra egiteko proiektua lizitatu dutela.
Osasun-etxe berriak 14.000 pertsona ingururi emango die estaldura, 11.400 helduen zerbitzuan eta 2.600 pediatria zerbitzuan. Guztira, 35 profesionaleko plantilla izango du; 8 familia-mediku, 4 pediatra, 14 erizain, gizarte-langile bat, psikologo bat, fisioterapeuta bat eta 6 administrari izango ditu. Erripagainako auzokideek albistea ospatu dute, nahiz eta sare sozialetan nabarmendu, datuak ez daudela eguneratuta. 12.000 dira helduak eta 6.000 0 eta 15 urte bitartekoak; egun 16.000 biztanle dira eta ez 14.000.
Proiektuaren eraikuntzan parte hartu nahi duten enpresek 470.000 euro inguruko aurrekontua izango dute eta otsailaren 7ko gauerdira arte aurkeztu dezakete proposamena. Erripagainako osasun-etxe berria eraikitzeko prozesuak aurrera egiten duen bitartean, Sarrigurendik eskaintzen den pediatriako arreta hobetzeko, zenbait erabiltzaile Mendillorriko pediatria zerbitzura bideratuko dira.