Goizaldeko hiruetan, ostiraletik larunbaterako gauean, hilik topatu dute kalean bizi zen pertsona bat. Udaltzaingoak eman zuen horren berri eta ikerketa Espainiako Poliziak hartu du. Lehen hipotesi eta zantzuen arabera modu naturalean hil zen herritar hori. Iruñeko Donibane auzoko Azuelo Monasterioko plazako bankuan topatu zuten.
Aterpea eskatzen duen inor ez kalean geratzen ari
Iruñeko Udalak abenduaren 28tik kalean lo egiten ez dela inor geratzen ari adierazi zuen: "Gizarte zerbitzuetan aterpea eskatzen duen orori eman zaio erantzuna", adierazi zuen Txema Mauleon Gizarte Ekintzako zinegotziak. Baliabideak eskaintzen dizkiete denei eta hotza egiten duen egunetarako gainera aterpean geratzeko ordu gehiago ere izanen dituzte: "Goizean goiz itxi beharrean eguerdira arte dute aukera aterpetxeetan gelditzeko", azaldu zuen. "Badira zenbait kasu nahiz eta aterpea eskaini halakorik nahi ez dutenak ere", jakinarazi zuen.
Une honetan, Iruñeak hiru baliabide ditu jasotako eskaerari erantzuteko: Trinitarioen aterpetxea, gaur egun 58 plaza dituena; Andre Apostolikoen eraikin zaharrean egokitutako aterpetxe berria, 60 plaza dituena; eta, azkenik, Protokoloan aurreikusitako ostatuetako gelen baliabidean, hotz-boladagatik, 11 logela bikoitz erabili dira modu egonkorrean, eta eskari handieneko gauetan 18 logeletara iritsi dira.
