Nafarroan Euskararen Legeak 37 urte egin ditu gaur. "Herritarren desberdinkeria eragiten duen legea da", esan du Amets Aranguren Euskalgintzaren Kontseiluko Nafarroako ordezkariak Euskalerria Irratian. Izan ere, bizitokiaren arabera hizkuntza eskubide batzuk edo beste batzuk aitortzen dizkie legeak herritarrei: "Irurtzunen bizi, iruñean edo Noainen bizi den nafarrak ez du eskubide berbera", azaldu du. Bestelako eraginez ere ohartarazi du Arangurenek: "Zerbitzu publikoetan eusakaraz aritzeko ezintasuna, euskaraz haurrek ikasteko egin beharreko kilometro andana edo euskaraz ikastearen edo herrian geratzearen arteko erabakia hartu behar izatea".
Inposizio hitza erabiltzen dute alderdi politiko hainbatek euskara aipatzen delarik: "Hizkuntza bakarrarekin gertatzen da hori. Gainerako hizkuntzak aipatzen direlarik aberastasunaz eta aniztasunaz hitz egiten dute", uste du Arangurenek. Hain zuzen, euskararen ofizialtasuna erdietsi nahi ez dutenek diote inposatu eginen litzaiekeela euskara nafar askori: "Etorkizuna eraiki nahi bada egungo egoera zein den kontuan hartu ordez aintzat hartu beharko litzateke zein gizarte eredu sortu nahi dugun", adierazi du Arangurenek.
Amets Arangureni egindako elkarrizketa osorik entzun dezakezu argazkiari klik eginda.
