Erakusketa honen helburua Ezkabarteko euskarari begirada zabala ematea da: garai zaharretako idazkietatik hasita, testu erlijiosoak, ordenantzak eta bestelako idazkiak bai eta azken hiztunak eta euskararen gaur egungo egoera ere.
Ekaitz Santazilia, erakusketako edukien arduradunak azaldu du euskaraz idatzita aurkitu diren 110 sermoiek eta beste testuek balio handia dutela: “Erakusketa honek argi erakusten du, batetik, euskara eta Ezkabarte eskutik doazela eta, bestetik, idatzizko hizkuntza ere bazela: etxerako soilik balio zuelako ideia hori baztertu behar dugu”.
Erakusketa azaroaren 25era arte Arreko Gizarte Etxean ikusgai izanen da eta azaroaren 24an bisita gidatu irekiak eginen dira 18:00etan euskaraz eta 18:45ean gazteleraz.
Igandean omenaldia
Igandean erakusketa Zildozko kontzeju etxera eramanen dute, herri honetan omenaldia eginen baitzaie Urtasun Lakidain apaiz anaiei, haietako nagusiaren jaiotzaren 250. urteurrenean.
Omenaldi ekitaldia Zildozko elizan izanen da 12:00etan eta sarrera librea aretoa bete arte. Jarraian Perutxena etxean, Urtasun Lakidain anaien sortetxean.
(Argazkian: Koldo Artola ikertzailea, Ceferina Cenoz Ezkabarteko azken euskal hiztunetako bati 80ko hamarkadan elkarrizketa grabatu ziona eta Ceferinaren hiru alabak, joan den ostiral arratsaldean Arreko Gizarte Etxean, erakusketaren aurkezpen saioan.)
