Kalera atera dira Nafarroako mugimendu feministako kideak, hilabete barru, azaroaren 30ean, egingo den greba feminista orokorrean parte hartzera deitzeko. «Lan handia dugu aurretik, eta indarrez eta ilusioz ekingo diogu», esan dute Zaintzaren Nazioarteko Egunaren karietara atzo egindako ekimenean. Nabarreria plazan brindisa egitearekin batera, gizarte osoari dei egin diote greba antolatzeko prozesura batzera, auzoetako eta lantokietako greba batzordeetan parte hartzera.
Kalera atera dira aldarrikatzeko zaintzarik gabe ez dagoela bizitza duinik: "Zaintzarik gabe ez baitago bizitza bera posible egiten duen euskarririk", irakurri dute. Iruñean ez ezik, Nafarroako hainbat herri eta auzotan ere egin dira ekimenak asteburuan zehar, grebara deitzeko; besteak beste, Zizur Nagusian, Burlatan, Eguesibarren, Garesen, Tuteran, Arrotxapean eta Barañainen.
Atzokoaz gain, Larunbatean Euskal Herriko Eskubide Sozialen Karta osatzen duten hamaika eragile sindikal eta sozial Gasteizen bildu ziren eta azaroaren 30eko greba orokor feministari babesa adierazi zioten.
