Urtarriletik aurrera erabilgarri izanen dute indarkeria sexuala jasan duten emakumeek arreta integrala eskainiko duen zentroa. Arrosadia auzoan izanen da eta Nafarroako 16 urtetik gorako emakumeentzat izanen da erabilgarri. 24 orduz zabalik izanen da eta arreta bertatik bertara edo telematikoki jasotzen ahalko dute biktimek. Gainera, ez da beharrezkoa izanen salaketarik jarria izatea zentro horretan laguntza eskatzeko.
Azken hilabeteetan gora egin du emakumeek jartzen dituzten salaketen kopurua eta horregatik Nafarroako Gobernuak beharrezkoa ikusi du zentro berria zabaltzea. Gobernuak eskaintzen dituen beste zerbitzuekin koordinatua izanen da eta modu horretan arreta integrala emanen zaio indarkeria sexuala jaso duen emakumeari.
