Itzali dira bafleak eta orain balantzerako ordua da. Atarrabiako gunean oraindik ere desmuntai lanak egiten ari diren bitartean, Aitor Agirrezabal, Hatortxu Rock jaialdiko antolakuntzako kideak aurtengo udako edizio bereziaren gaineko balorazioa egin du. "Jaialdia arrakastatsua izan da, jendetza etorri da eta udan antolatzearen inguruan genituen zalantza eta kezkak uxatu ditu" azaldu du Agirrezabalek, "Eguraldiak lagundu du eta giroa ia ia bikaina izan da". Jaialdian zehar 8 eraso matxista eta homofobo salatu dira eta horrek ilundu du balantzea, "Gizartean dagoen arazoa da eta Hatortxu tamalez ez da horretatik libratzen" aitortu du antolakuntzako kideak, "Lanean jarraituko dugu denok gozatzeko eremua izatea Hatortxu Rock". Jaialdia ordubete lehenago amaitu zen salaketak ezagutu zirenean.
Egunotan 1.500 bolondres izan dira lanean Hatortxu jaialdia aurrera atertazeko. "Izerdia botata lortu ditugu txanda guztiak betetzea" azaldu du Aitor Agirrezabalek, "Izugarria da 1.500 pertsona auzolanean biltzea, eta oraindik ere egin daitekeela erakutsi dugu". Festa eta auzolana uztartzea geroz eta zailagoa da gure inguruan, "Ez da Hatortxuren kasua bakarrik, ikusi dugu geroz eta toki gehiagotan arazoak daudela lan boluntarioak biltzeko...arazo orokorra da, baina gure kasuan 1.500 lagun bilduta txalotzeko eta eskertzeko modukoa da".
Abenduaren 17an hurrengo Hatortxu Rock
Udako edizio berezia amaituta eta desmontai lanak oraindik ere martxan direlarik, antolakuntzako kideak hasi dira abenduko ohiko jaialdia antolatzen. "Hasi gara taldeak deitzen eta elkartasun jaialdia antolatzen" azaldu du Agirrezabalek, "Gertuago ikusten da amaiera, preso politiko asko Euskal Herrian daude eta geroz eta gutxiago kartzela barruan, baina oraindik 180 daude espetxean eta bat bera ere preso dagoen bitartean, Hatortxu Rock-ek aurrera jarraituko du".
