"Eraman nazazu edo lanaba sartuko dizut bestela" hitzekin sartu zen villavesa batean erabiltzailea. Mehatxua egin zion sartu eta berehala eta gidariaren atzean eseri zen bidaia osoan. Ez zion geldialdietan gelditzen utzi eta berak nahi zuen tokiraino gida zezan agindu zion. Gidaria nerbiostu egin zen ez zuelako ikusten gizonak zer zeraman motxilan edo eskuartean. Tentsio une horretan laguntza eskatu zuen igorle-aparailuaren bidez eta babes hori jasoko zuela esan arren halakorik ez zitzaion iritsi. Espainiako Poliziako bi kideri ohartarazi zien gertatzen ari zenaz eta atxilotu egin zuten gizonezkoa. Autobus gidariak urduritasuna, takikardiak eta buruko mina zituenez ospitalgunera hurbiltzea erabaki zuen eta besterik ez zionez enpresak jartzen autobusarekin gerturatu zen mediku batek arta zezan.
Ez da arazo bakana azken eraso hori. Neurriak falta direla salatu dute beste behin ere. Manparak eskatzen ari dira bereziki gaueko zerbitzua egiten duten autobusetan. Arriskua etengabekoa dela uste dute edozeinek kalte egin diezaiokeelako gidariari.