Otsailaren batean, Euskalerria Irratiak lizentzia ofiziala jaso zuen. Maiatzean, frekuentzia berrian, FM 98.3an emititzen hasi zen, Ezkaba menditik Iruñerri osora iristen den seinalearekin, indarrez, kalitatez, behingoz, sortu eta 28 urtera.
Astelehenean, irailaren 19arekin hasiko den denboraldi berrian, Euskalerria Irratia euskaldun gehiagorengana indar handiagoz iritsiko da. Eta ahalegin berezia egin du programazioa ere zabalagoa eta indartsuagoa izan dadin.
Albistegi indartuak
Albistegiak indartu eginen ditu. Maialen Huartek hartuko du Iruñerrian gaur eguerdiko albiste emankizunaren gidaritza. Harekin batera ariko dira Mikel Bujanda eta Saioa Alkaiza kazetariak. Bujandak goizeko albistegia zuzentzen segituko du.
Irratia, Lehen Mailan
Osasuna Lehen Mailara itzuli den honetan, Sadarreko partidak zuzenean eskainiko ditu irrati euskaldunak. Iñaki Berastegi eta Eñaut Agirrebengoa kazetariak arduratuko dira zeregin horretaz.
Martxelo Sotesen umore saioa
Umoreak tarte zabalagoa izanen du denboraldi berrian, Martxelo Sotesek eta Julen Leuzak umorezko saioa eginen baitute asteazken arratsaldeetan. Gaurkotasunari ironia handiz helduko diote, Sotesen imitaziorako gaitasun itzela baliatuz.
150 kolaboratzaile
Goizeko magazina, Metropoli Forala, Pello Argiñarenak eta Juan Kruz Lakastak eginen dute. Arratsaldekoa, Irrintzi Plaza, Txari Eletak eta Reyes Ilintxetak. Bi saioetan, orotara 150 kolaboratzailek parte hartuko dute.
Batzuek, hamarkadak daramatzate kolaboratzen: Aingeru Epaltza, Inma Errea, Jon Alonso. Beste batzuek, gutxiago: Angel Erro, Ioar Cabodevilla, Hedoi Etxarte. Denen artean bihurtzen dute Euskalerria Irratia Iruñerriko euskaldunon topagune, plaza, sorleku.