Argazkian Berriozargo kultur etxeko aretoa, joan den ostiralean, euskaltzalez betea. Mahaian Xaloa telebistaren arduradunak eta egitasmoaren erakunde laguntzaileak. Gaur bertan abiatuko du bere emisioa eta, horrenbestez, lehen aldiz ikusiko da euskarazko telebista Iruñerrian baimen guztiekin. Baztandik etorrita, eta ez autonomia erkidegotik.
Hori asko izanik, hastapena besterik ez da. Euskalerria irrati honek oso aurreratua dauka agerkari digital indartsu bat, bere edukiez gain Xaloa telebistarenak ere emango dituena. Eta, are garrantzitsuago, Iruñerriko komunitate euskaltzalea partaide aktibo izango duena.
Ze herritarrok ez dugu soilik irakurri, entzun edo ikusi nahi; gero eta gehiago nahi dugu idatzi, esan edo erakutsi. Eta agerkari berria bereziki dago horretarako prestatua, eta hori izango du helburu: euskararen komunitatea sendotzea, zabaltzea eta ikusaraztea Iruñerrian. Eta gainera, sarean egongo da antzeko beste agerkari askorekin Euskal Herri osoan zehar.
Asko dauka irabazteko nafarron hizkuntzak Nafarroan. Izan bitez hedabideok horretarako bilgune eta palanka!