Parisko atentatuaren harira, argazki bat gailendu zait beste guztien artean. Hildakoen omenezko manifestazio batean, euri-langar modukoaren azpian, ingurukoek ez bezala, aterkiaren ordez, arkatza jaso du emakume batek.
Arkatzarekin babestu du bere burua emakume horrek. Arkatza erakustearekin adierazi ditu bai bere mina baita bere protesta ere.
Egunkari asko eta askotan, aldiz, polizien argazkiak ikusi ditut azaletan. Poliziak arropa eta kasko deigarriekin. Poliziak arma deigarriekin. Poliziak ibilgailu deigarriekin. Poliziak...
Terrorismoaren izua kudeatzeko, poliziaren gain-erabilpenak, kontrol-neurrien zorrozteak, immigrazio-legeen berridazketak... izu erantsi bat dakar; ofiziala, baina izu. Eta izua, izu.