Podemosek ez du ezker abertzalearen aliatua izateko asmorik. Iñigo Errejonek, Podemosko Politika idazkariak erran zuen atzo. Ez da egun hauetan erraten duten lehen aldia. Istorioa behin berriz errepikatzen da. Legea edo madarikazioa: Madrilen ez du inoiz aginduko ezker abertzalearekin inolako adiskidantzarik, begirunerik, hurbiltasunik, auzotasunik, keinurik duen inork. Eta Podemosek Madrilen agindu nahi. Nafarroan zer gertatzen den Podemosko nafarrei axola zaie, nonbait, baina deus guti Madrileko Podemoskoei. Haien barne arazoa balitz, gaitz erdi. Baina gure arazoa ere bada, Podemos gabe ezin baitugu.
