Argazkian 38 aulki tolesgarri biribilean jarrita, Iruñeko Sarasate pasealekuan. Eta aulkietan gizarte mugimenduen beste hainbeste ordezkari, elkarren berri trukatzen. Parlamentu soziala deitu diote ekimenari, nolarebait beste parlamentuari –instituzionalari- falta zaizkion irekitasuna eta herritarren parte hartzea sustatu nahi dituelako.
Aro berriaren ezaugarri bat da herritarren aldetik erakundeengan delegatzeko joeraren amaiera; bistan da soilik lau urtean behin bozkatzea ez dela aski eta txandrio galantak egiten dizkigutela, kontrolatu ezean. Hain zuzen kontrol hori bideratzeko ere sortu da nafar parlamentu soziala.
Bestea, instituzionala, astindu galanta jasotzeko bezperetan legoke, oraingo aurreikuspenak betetzen badira. Sei hilabeteren bueltan ezagutuko ditugu honen xehetasunak, baina dagoeneko esan daiteke bi parlamentudun Nafarroa hau oso ezberdina datorrela. Eta, ze arraio, gustatzen zait hartzen ari den traza.