Auzitegira sartzen ikusi dut Javier Maroto, Gasteizko alkatea, PP alderdikoa. Bere traje urdinarekin azaldu da epailearen aurrera. SOS Arrazakeria delako elkarteak eraman du alkatea auzitara.
Harri koxkorrarekin estali nahi du PPk zulo handia. Gizarte-laguntzen gaian, etorkinen iruzurra jarri digu begien aurrean Marotok. Iruzurra beti iruzur; baina handia, beti txikiaren bi halako.
Diru beltzekin Suitzako bankuetako kutxa gotorrak leporaino betetzea onartu eta sustatu duen politika kontserbadore espainiarra arduratuta dago orain etorkinen iruzurrarekin. Iruzurrak ez du justifikaziorik, ezta etorkinenak ere. Saihestu beharra dago, jakina.
Baina, susmoa dut hau guztia dela ke-gortina bat, beste bat. PPk bizi duen krisi politiko sakona -sinesgarritasun-krisia, etika-krisia- estaltzeko darabilen ke-gortina bat, beste bat. Hauteskundeak hain dira-eta hurbil...