Su-izar batean su hartu ez duen zunda. Rosetta misioa. Zientziaren lorpen bat; ulertzen ere zail egin arren begien bistan daukaguna.
Hieroglifoen hizkuntzak deszifratzeko mugarria izan zen hura gogoan, planeta honetako bizitzaren eta eguzki sistemaren jatorria dekodetzeko tresna izango omen da.
Gure mikro-kosmos honetan egunotan ikusten ari garenaren metafora dirudi.
Barcina itzali berria utzi eta su emango ez dion beste su-izar baten bila NafarroakoErregimena2015 misioa zeruertzean.
Eta Espainiako eta Nafarroako gobernuen irain-zunda lanean, eguzkiari aurpegia erakutsiz eta besoa altxata harro kantatzen zuten haiek babesten, milaka eta milaka pertsonari lur eta min eman zion mugimendu nazional-katoliko faxista zuritzen.
Memoria su-izar bat da.
Gure sistemaren jatorria dekodetzeko, denok behar genuke Rosetta izan.
Etorkizunaren zientziak hala erakusten digu.