Absolbitutako ia guztiak agerraldia egin dute.
Kazetarien aurrera atera dira gaur eguerdian Espainiako Auzitegi Nazionalak libre utzi dituen gazte independentistak. Berrogei epaitu dituzte eta ia guztiak zeuden. Lau urte eta erdi iraun du prozesuak. Bi urte inguru pasa zituzten espetxean, prebentibo gisa. Inkomunikazio aldian torturatu egin zituztela salatu zuten haietako askok. Eta orain absolbitu egin ditu Auzitegi nazionalak.
Epaiaren zenbait datu
Batetik, epaimahaiak balioa ukatu die inkomunikazio aldian eginiko deklarazioei. Baita instrukzio epailearen aurrean, Grande-Marlaskaren aurrean eginiko batzuei ere. Nabarmentzen duen bestea, Gazte Independentistak erakundeak ez zuela kale borrokarekin inolako loturarik. Bide baketsuekin soilik jarduten zuela politikan.
Gazteek hartu dute hitza
Txalo zaparrada artean, batzuen eta besteen arteko besarkadekin ekin diote 40 auzipetuetako gehienek agerraldiari. Irribarrea ahoan, pozez hartu dute epaia. Zama gainetik kenduta, atzera begira jarri dira. Pasatakoa latza izan bada ere, etorkizunari begira konpromisoarekin segitzeko asmoa dutela nabarmendu dute. Alegia, konponbideak berrogei militante berreskuratu dituela.
Epaiak, uste dute, aitortzen duela eta agerian uzten duela errepresioaren eta inkomunikazioaren ondorioa zenbaterainokoa den. Gehiengo berria osatzen jarraitzeko asmoz, epaia, aldaketaren abiapuntu izateko desioa dute 40 gazteek. Hain zuzen, gehiengo berri hori osatzera deitu zuten epaiketa amaierako alegatuan, eta alegatu hura berriro irakurri dute gaurko agerraldian.
Txaloka amaitu dute agerraldia. Kontent. Eta iragarri dutena, bihar, abokatuek eginen dutela epaiaren hausnarketa eta irakurketa zehatzagoa.