Nuclenorrek Garoña berrabiarazteko planekin aurrera egiten badu, Nafarroako Parlamentuak herritarrak eta nafar erakundeak bultzatuko ditu Iberdrola eta Endesa enpresekin dituzten kontratuak bertan behera utzi eta Garoñako zentralarekin zerikusirik ez duten beste hornitzaleengana jotzera elektrizitate zerbitzuak kontratatzeko. Hori dio atzo Nafarroako Parlamentuak Garoñako zentral nuklearra berrabiaraztearen kontra onetsi zuen mozioak.
Atzoko albiste nagusiak –Espainiako Erregearen abdikazioak– mozioaren berriari itzal egin bazion ere, inoiz baino argiago mintzatu zen atzokoan Nafarroako Parlamentuaren gehiengoa Garoñaren aferaz.
Uxatuko ahal du Nafar Parlamentuaren boikot-abisuak Garoña berriro irekitzeko mehatxua! Albiste ona izango litzateke herritarrontzat.