Podemos. Ahal dugu, alegia. Bertze itzulpen batzuk posible genituen. Gauza bera ederrago adierazteko gai ginen. Ez gara, alabaina, hizkuntzakerietan luzatuko. Ez zeuden bestara gonbidatuak eta hara non gonbidapenik gabe agertu zaizkigun jadanik otordua hasia zela. Mahaiaren eskuin aldean adarrez eta buztanez jantzi dituzte jadanik. Dena desegitera heldu dira nonbait. Ezker aldean ere gaizki disimulaturiko mesfidantzaz so egiten diete. Mahaiaren zoko abertzalean ere, gutienez ere harriduraz. Nor dira hauek bat-batean guk osorik jan nahi genuen tartaren zati batez jabetu direnak? Ez dira gure kofradiakoak, baina bidelagun izan litezke. Hemendik aitzina, nolanahi den, edozein gauza egiteko kontuan hartzekoak. Auskalo posible ez ote duten. Batek daki gai ez ote diren.
