Argazkian jende multzo handi bat kalean. Izan liteke Iruñeko manifa larunbatean osasun publikoaren alde; edo igandeko Herri Urratsen festa Senperen Seaskaren alde; edo Gure Esku Dago nonahi egiten ari den gizakate lokal horietako bat, erabakitze eskubidearen alde, ekaineko handia prestatzeko.
Urtero maiatzean mukuru betetzen da natura, eta baita kaleak ere. Natura, lorez, eta loreila ere deitu izan zaio maiatzari horregatik. Eta kaleak betetzen dira jendez, negua atzean utzita eguzkiak burmuinetan ernaraziko baizukeen besteenganako interesa.
Ongi daude loreak maiatzean. Baina iraun beza urte osoan jendeak kalean. Ez dadila itzali herritarrongan interesa eta kezka besteekin partekatzen ditugun gauza garrantzitsuekiko, hots, osasun publikoa, demokrazia edo euskara. Gai horietan, izan bitez hile guztiak lore-hilak.