Bat. Madrilgo Lengua de Trapo argitaletxeak “El estado de las cosas de Kortatu (Lucha, fiesta y guerra sucia)” kaleratu du Roberto Herrero eta Isidro Lópezen eskutik. Sistema ideologiko eta musikalaren bazterrean aritu zen taldearen liburua. Euskal inteligentziak, kultur erakunde eta unibertsitateek, ematen duenez, ez dute gaia interesgarritzat jo. 25 urtetik gora Kortatu desegin zenetik memoria aktibatzeko aukera. Gomendagarria. Hitzaurrea Atxagak idatzi du.
Bi. Hispanitateko komunikazio proiektu sistemikoa da PRISA (Liberty Acquisition Holding inbertsio funtsa estatubatuarraren esku dago). Propietate askoren artean El País, As edo Cinco Días egunkariak; Ser irrati katea, Los 40 Principales, Máxima FM, M80, Radiolé edo Cadena Dial; Santillana, Alfaguara, Taurus edo Aguilar argitaletxeak; Canal+ eta gehiago. Larunbatean eta igandean, beste hamaika aldietan bezala, aparteko espazioa eman dio Atxagari bere azken liburuaren garrantzia azpimarratuz.
Aste berean egilea agertu da proiektu antisistema izan zen Kortaturen liburuaren hitzaurrean eta komunikazioan eta kulturgintzan proiektu sistemikoaren paradigma den El Paísen. Idazleak idatzitako liburuak baino gehiago saltzen duen garaian bizi gara, orkestra zuzendariari orkestra berari baino balio handiagoa aitortzen zaiona, irudia estimatzen zaio komunikatzaileari eta ez hainbeste diona.
Peter Wollenek idatzi du: “Arte garaikidean (…) giza errealitatetik erretirada gertatu da banakako eremu estetikorantz, ideologikoki ustez inuzentea dena. Artearekiko konpromiso hutsaren izenean. Horretarako, gaia desagertzea edo desaktibatzea oinarrizko baldintza da, ideologiaz tindatua dagoelako eta artista eta bere lana politikoki nahasten dituelako.”