Gaurko argazkia ez da inon argitaratu, pribatua da. Bertan ageri da –makulu eta txapel- iheslari historiko bat, oso aspaldian aldegina. Urte asko daramatza erretiratuta baina ez da jaioterrira itzuli, eta ez da itzuliko.
Argi dio: “Gure ‘fabrika’ ere itxi da, horrek ez dauka atzera bueltarik”. Baina berak adin handia du eta bizimodua Iparraldean antolatua, bertan geratuko da.
Horregatik argazkiko iheslariak bozka darama eskuan: parte hartu nahi du aterbetu duen herriko udalaren hautaketan. Eta bere bizi osoan lehen aldiz emango du bozka, aro berriari zor.
Nire golkorako, eskerrak argazkia pribatua den. Ze imajina ditzaket hamaika izenburu zital, hedabide jakin batzuetan, iheslari zahar birziklatuaren kontura.