Iruditzen zait, honez gero, politikari eta kazetariek urrunago ikusten dituztela foru parlamenturako hauteskundeak. Hordagoa bota zuena “missing” egon da azken egunotan, kazetariengandik ihesi, ataka honetatik nola atera hausnartuz, seguru asko.
Eta hori da politikaren arazo nagusienetakoa: gehiegi direla politikan, agintaritzan edo oposizioan, nola edo hala, bizirik segitu nahi dutenak. Barcina presidenteari ere erresistentzia-ahalmen handia aitortzen diote guztiek, baita aurkari sutsuenek ere.
Eta hala da, azken urteotan maiz erakutsi du ataka askotatik ateratzeko gaitasuna daukala. Kontua da arazo hain larriak dituen gizarteak bestelako politikariak behar dituela. Izan ere, irautea, bizirik segitzea helburu bakar duenak nekez erantzunen dizkie gizartearen erronkei, gobernutik edo oposiziotik.
Agian, hori da Nafarroako politikaren arazo nagusia. Eta beti bezala, biztanleria da galtzailea. Agonia zenbat eta gehiago luzatu, orduan eta garestiago ordainduko dugu etorkizunean.