Egunkariaren azal oso-osoa betetzen duen argazkiarekin nator gaur. Espainiako parlamentuan atera da argazkia. Abortuaren lege berria onartu da han: PPk aldeko bozka eman du, barne-hausturarik gabe. Espainiako eskuin egoskorraren egunkariak honela titulatu du: Ongi uztarturik, bizitzaren aldeko botoa eman du PPk.
Zer izango da hurrengoa? Fimosia debekatuko ote dute? Tronpen lotura? Pilulak hartzea? Erreprodukzioan pentsatu gabe, inorekin oheratzea?
Esperpentoa bada genero literario bat. Oso espainiarra. Antzerki groteskoa da. Kontu zentzugabeak azpimarratzen dituena. Valle-Inclán idazleak maisuki jorratu zuena eta Borbon dinastiaren errestaurazio-garaiak kritikatzen dituena. Esperpentoan, herri deformea da Espainia, injustua eta zapaltzailea…
Abortuaren lege berri honekin, asmatu egin du PPk. Absurduan asmatu du. Esperpentoan asmatu du. Picalagartos taberna bihurtu du Espainiako Parlamentua.